個個都鐘意食車仔麵，唔通個個都識食車仔麵咩！今次同大家了解下八款麵底嘅營養成份，比拼一下麵底同配料所含嘅卡路里、碳水化合物、蛋白質同脂肪。仲會介紹6間良心車仔麵，港九新都有㗎 LET’S GO ⇢
謎思（1）湯底點揀好？
熱量最低一定係咁冇多調味同油份嘅「清湯、魚湯」。次選已經屬較高卡、高糖、高鈉嘅「咖喱、沙嗲、喇沙」。當然講到最肥膩一定係加入大量油烹調嘅「麻辣」、同以牛各部位熬成、高脂高膽固醇嘅「腩汁」。當然，就算選擇低脂低卡嘅湯底都唔建議飲湯，普遍鈉含量都非常高。
謎思（2）咩麵底最健康？
比較健康，且最多營養師推薦嘅「米粉」相對最低卡．低碳水含量、低脂，而相若數值嘅「米線」所含嘅蛋白質亦較高，最推薦；「粗、幼麵」都屬於全蛋麵，整體中規中矩；「即食麵」就係眾所皆知嘅高卡、高脂、高鈉邪惡品。
註：C＝碳水化合物含量；P＝蛋白質含量；F＝脂肪含量
謎思（3）河粉都好低脂，應該都好健康？
最多人誤以為健康嘅河粉，雖然係由脂肪含量極低嘅米漿造成，但廠商會因避免麵條黏埋一齊，以及增加軟滑嘅口感，喺製作過程就會加入大量油份。另外因為河粉容易吸湯汁，如果選擇高油、高鈉嘅湯底，如麻辣、腩汁．沙嗲等，食100克嘅熱量同脂肪都會大幅上升。每間廠商加入嘅份量不一，加上湯底都係影響嘅關鍵，所以都較難估算食100克嘅脂肪含量。
謎思（4）叫咩餸好？
車仔麵任你點，可以根據個人需要去選擇。減重人仕可選擇蟹柳、白魚蛋、魷魚等低卡低脂配料，但要留意有啲食物選擇營養價值都唔高，有有啲亦會係烹調方法唔而產生潛在嘅熱量同脂肪。
健身人仕或低醣高蛋白質飲食者可以選擇豆腐、雞蛋、雞肉等高蛋白質配料。不過同屬高蛋白質嘅豬大腸雖然每100含6.9克蛋白質，但同時熱量高，亦含18.7克脂肪，所以真係少食多滋味。
如果要均衡選擇就最好多菜少肉，吸收多啲纖維素。另外建議選擇原態食物(即非加工食品)。阿蛋已經將整體最健康嘅配料特別標記咗喇！
⟠
良心車仔麵推薦
❙ 三不館車仔麵
📍大埔廣福道88號地下
📍荃灣登發街10號地下
單單裝修同佈置，就令人覺得有種好懷舊嘅港式風味。麵底都係常見款式，但配料就有所驚喜：有獨特嘅「秘制香醬鳳爪」、工程繁複嘅「鮮沙薑豬手」，仲有日式嘅「粟米豚肉餃子」、馳名嘅「醬燒豬頸肉」同「金牌香辣豬手」，可見相當有心思。哩間大埔名物已經拓展到荃灣，新界嘅朋友不妨多多支持！
⟠
❙ 饗 車仔麵
📍深水埗基隆街391號地下
嚟到哩間一定要食佢地「自家製」系列，6款都相當出色、有驚喜，尤其係醉饗蛋。看似平平無奇，但一咬整個口腔都係酒香，非常入味。另外介紹「菠菜麵」、「墨汁墨魚丸」、「日式豬軟骨」都係較少見嘅車仔麵配料。除咗麵食，「蝦多士」、「醉饗雞翼」同「南乳豬手」都係馳名而獲得一致讚賞呪必試小食。
⟠
❙ 麵尊 Min Jun
📍銅鑼灣登龍街18號V Point地下5號舖
雖然位置地租貴嘅銅鑼灣，但價錢實惠、份量十足、而且CP價高，難怪門外成日大排長龍，尤其午飯時間一定人頭湧湧。最欣賞佢地嘅腩汁，唔會好油膩，但保持到腩汁個種濃郁嘅牛味。私心推薦滷水雞翼，肥美多肉，且非常入味。加埋佢地嘅秘製麻辣醬，包你食過翻尋味！
⟠
❙ 蒙麵
📍紅磡差館里9-15號協輝大廈地下1號舖
喺店外排隊見到各張告示已經知道老闆豪言豪語、非常有性格，更稱：「唔好食幾平都無用」，令人有所期望，但絕對唔會失望。哩間係同區相對出名，唔只街坊捧場，亦有唔少區外人嚟潮聖。馳名嘅唔只「特濃蕃茄薯仔湯」湯底，仲有獨有嘅「蒙麵」。配料方面阿蛋推薦「韭菜餃」、「溏心滷蛋」、「五香牛筋」、「辣味魷魚」同罕見嘅「新鮮花甲」。而佢地嘅招牌仲有小食——肥瘦勻稱嘅「蜜汁叉燒串」，即叫即燒，同樣名乎其實。
⟠
❙ 喜喜麵館
📍紅磡崇潔街26號地舖
瑟縮係內街嘅喜喜麵館雖然唔起眼，但因為抵食、好食、兼多選擇而得到街坊歡心。湯底選擇有健康嘅「清水鹽湯」同「魚湯」；配料方面比較特別有「魚肉炸豆卜」、「蜆」、各式滷水及各樣麻辣食物。佢地亦有「特式麵類」，已經配好湯底同配料，啱晒選擇困難症嘅朋友。
⟠
❙ 壹碗壹碟
📍筲箕灣筲箕灣東大街28-40A號東興大廈地下2號舖
📍大角咀角祥街2號地下J號舖
招牌推介有「椒積豬扒麵」、「瑞士雞翼麵(大角咀店限定)」同埋「腩肉滷蛋麵(筲箕灣店限定)」，當然亦可以自選粉麵同配料。比較特別係麵底可揀「粉絲」，餸方面有「魚肉春卷」、「年糕」、「漢堡扒」等特別選項。不得不數一定係佢地嘅避風塘小食，有雞粒、魚蛋、豆腐、豬肉條。四款都金黃香脆、齒頰留香。
⟠
如果有任何小店優惠、告急、或者想我地喺平台撰文介紹，
都可以IG私訊、網站填form、或者電郵致 852eggies@gmail.com
我地會盡所力，為大家帶嚟更多真香港人情報 (•̀ᴗ•́)و ̑̑
Comments