手殘恩物氣炸鍋・原理＋4間良心食材推介
- 852eggies
- Nov 16, 2020
- 3 min read
2020年大家在家抗疫，為咗唔想食咁多外賣，唔少人開始「自煮生活」。今次講下人人用完都搖身一變成為廚神嘅「氣炸鍋」，聲稱唔需要用油就「炸」出各式各樣嘅食物。講到咁好，到底係咪屬實呢？另外會推介4間賣氣炸鍋嘅良心食材店。LET’S GO ⇢
氣炸鍋原理
簡單講解，就係透過鍋頂所產生的熱力，，以高速空氣循環技術，將熱空氣包圍食材，逼出食材本身的油份並帶走水份，做出油炸效果。煮食過程方便、唔洗睇火；氣炸鍋操作簡單，只需要較好時間同溫度；加上完成品唔會油膩，且帶香脆感，所以近年深受歡迎。
真係一滴油都唔洗？
如果食材本身有油脂，例如：豬扒、雞翼等，就可以唔需要額外加油。假若食材本物冇咩油脂、甚至高澱粉質含量，例如饅頭，完成品只會將水分抽乾，缺乏應有嘅軟熟感。口感硬化，唔能夠達至「炸饅頭」效果。所以自身冇咩油脂嘅食物都需要掃上少少油，先可以「炸」至香脆可口。
氣炸鍋優點VS缺點
優點
（1）油脂份量較低
比起油炸方式，氣炸的確較低熱量、油脂含量，所以完成品都相對健康而又不失香脆口感。
（2）「丙烯醯胺」致癌物較低
澱粉食物經高溫加熱後會產生致癌物「丙烯醯胺」。以油炸作比較，氣炸嘅食物嘅「丙烯醯胺」含量大減。
缺點
（1）時間控制難預計
市面暫時未有透明蓋嘅氣炸鍋，所以無法見到食物當刻狀態，難以預計時間及效果，需要自行測試。不過網上陸續出現氣炸鍋嘅食譜，相信問題唔會太困擾。
（2）增加患「高罹癌」嘅可能
高溫會令蛋白質變質，產生較多嘅多環芳香烴及多環胺類化合物，增加高罹癌嘅可能性。所以唔建議經常氣炸雞肉、魚肉、豆製品等。
（3）罪惡感減低，小心食多咗
氣炸鍋的確食取代油炸嘅良品，完成品油脂含量的確較少，但都唔代表係「健康食物」。少食多滋味，小心罪惡感減低後食多咗，注意熱量同份量。
良心食材店推薦
氣炸鍋食材多數已經醃製好，甚至包埋炸粉，落鍋即可氣炸，絕對係懶人恩物。今次介紹4間良心食材店，有實體舖亦有網店，希望方便到大家選購。
1 ❙ 叁拾士多
📍 九龍觀塘成業街成業工業大廈3樓22室
📍 九龍荔枝角長沙灣道億利工業中心1樓10A室
📍 西環堅尼地城吉席街46至60A號吉豐大廈K號地舖
📍 新界大埔廣福道146號地下
https://30store.hk
「氣炸鍋系列」搜羅各地食材，例如韓國炸醋扒、日本珍寶章魚小丸子、越南一口芝士雞蛋仔、法國迷你朱古力酥等，咸甜都有。佐酒小食之外，仲有適合做早餐嘅麵包類、同主食嘅扒類，非常多選擇。
2 ❙ Mr. Cool 國際優質食材專門店
📍 深水埗汝州街162號地下
佢地嘅「氣炸系列」小食為主，亦有唔少甜品類食材，例如心太軟、流心芝士撻、葡撻、一口班戟等，比較適合嘴饞而傾好甜食嘅朋友。另外仲有「無激素系列」，可以安心食用雞肉及豬肉，不過需要自行醃製。
3 ❙ 大角咀潘太
📍大角咀福全街67號市政大廈地下M7號鋪
*暫時只接受whatsapp下單*
哩間較多咸食小食，例如忌廉蟹肉餅、韓國芝士麻糬波波、日本燒迷你甜薯、台灣牛肉餡餅等，輕鬆做好下午茶，或者深夜時份睇波、同朋友chill下就啱晒。潘太仲會不時分享點樣善用佢地嘅「氣炸系列」，有齊醃製方法、烹調時間等，簡潔而明。就算係新手上路都冇有怕！
4 ❙ 輕鬆煮 Cook Like Me
📍 香港堅尼地城士美菲路45號Smithfieldwalk低層地下4號舖
跟住佢地煮食就真係「輕鬆煮」喇！有各種營造炸物口感嘅氣炸小食，例如比較特別嘅「薯絲蝦」、「麥樂魚」，金色外表吸引、香脆表面可人，絕對俘虜鐘意炸物嘅朋友！不過相對少醃製好、非香炸類食物。
⟠
如果有任何小店優惠、告急、或者想我地喺平台撰文介紹，
都可以IG私訊、網站填form、或者電郵致 852eggies@gmail.com
我地會盡所力，為大家帶嚟更多真香港人情報 (•̀ᴗ•́)و ̑̑
Commentaires