是蛋遊：堅尼地城／隱世行山徑・馳名煲仔飯

Dec 5, 20204 min read

相信講起西環，大家都會諗起打卡熱點——西環貨運碼頭 (網稱Instagram Pier)。其實西環係統稱西營盤、石塘咀、同堅尼地城3個部份，本來同屬舊區，環境同氣氛都好一致。但隨住多項清拆及重建計劃，三個地方變得各有特色。今次阿蛋先帶大家主攻俗稱「西環尾」嘅堅尼地城，睇下有咩食、玩、行！LET’S GO ⇢

第1站：搵嘢食先！

i．輕食之選正宗台灣

❙ 阿元來了

(@yuanishere)

📍西環堅尼地城北街31號地舖

其他分店：

📍牛頭角鴻圖道28號地下B號舖

📍觀塘鴻圖道28號地下後座

食飽先有氣力迎接之後嘅行程。第一站先食個台式午餐，份量唔算多但CP價高，食到正宗台灣風味又唔會太飽臍。「阿元」總店喺觀塘，而西環哩間係分店，但依然保持水準。阿蛋推薦爆漿芝士蛋餅同香濃入味嘅鹵肉飯，絕對可以滿足到去唔到台灣嗰份思「鄉」之情！

ii．餓鬼之選港西風味漢

❙ Beeger

(@beeger2hk)

📍西環堅尼地城士美菲路1-15號美新大廈地下J號舖

附近仲有另一間西餐廳，招牌菠蘿包漢堡。有興趣可以睇返之前嘅文章。

【延伸閱讀：良心漢堡合集EP.2／告別金拱門】

第2站：遠離塵囂全石屎級輕鬆行山

哩條行山徑雖然唔係正規，但多數係石屎梯級，而非爛地或者泥土，加上沿途並冇分叉路，唔會蕩失路之餘又相對易行。

由於唔係正規行山路，地圖上係冇顯示路徑同入口，但其實並唔難搵。（圖中標誌為入口）只要沿域多利道行，過咗「傲翔灣畔」之後，入口就係對面嘅鐵絲網旁邊。上山時間大約1.5至2個鐘，地型唔難行，只係行梯級需要啲腳骨力。

行到盡頭入見到個涼享，可稍作休息再行上青年旅舍嘅方向。沿路會見到歷史遺漏嘅軍事建設「摩星嶺砲臺」，亦可以遠眺西邊一望無際嘅海，非常怡人。

到達青年旅舍之後，由旁邊石級繼續上行，就到達綠草如茵嘅大地草，可以野餐休息。落山速度比較快，30分鐘左右就返到域多利道。

第3站：打卡熱點西環泳棚

落山沿斜路上少少就見到人氣打卡熱點——西環鐘聲泳棚嘅入口。眼前並無障礙物，海天一色盡入眼簾。聽住海浪上落，吹住微鹹嘅海風，完全忘記自己置身市區。黃昏嘅景色更加嘆為觀止，阿蛋建議大家可以留低，睇住紅澄澄嘅咸蛋黃慢慢沉沒係大海之中，畫面非常引人入勝。

第4站：反撲歸真環保生活概念店

❙ SLOWOOD

(@slowood.hk)

📍堅尼地城爹核士街11號浚峯地下1-3號舖

親親完大自然，係咪覺得身心舒暢呢？除咗感受大自然嘅美好，我地亦需要好好保護自然環境，而其中一個方法就係響應環保。綠色生活哩個議題都推動多年，除咗相關團體同組織，位於西環嘅「Slowood」同樣想推廣環保生活，希望係日常生活中提供更多方案去減塑、減排放、減低污染。「Slowood」係一間主張環保生活嘅概念店，有齊生活雜貨、護理用品，仲有開門七件事嘅必需品——柴米油鹽醬醋茶，有機食物… 範圍廣泛，絕對稱得上一間百貨店。購買食品嘅形式就好似舊時雜貨店，份量因人而異，唔洗被固定包裝綁死，以免造成浪費。店舖鼓勵大家自備可循環再用嘅器皿，同場亦有賣新式嘅環保器皿，培養綠色生活嘅習慣。

其實要實踐環保生活並唔困難，每個人嘅方法亦不一，若果搵到適合自己、最舒服、最方便嘅方法，就更加能夠持之以恆。不妨去行下哩間環保百貨店，拎下靈感點樣為咁美好嘅大自然出一份力啦！