就嚟又有連日紅假，大家諗好去邊度消遺未呢？記得去到邊都要勤洗手同消毒啊！今次阿蛋想帶大家去錦田半日遊，感受當地原居文化、漫遊藝術打卡熱點，仲重要係去屬於香港嘅山系風鈴祭！即刻入網睇全文啦！
第1站：搵嘢食先！
CoHee Studio
(@coheehk)
📍元朗錦田市街152號地舖
一如以往，都係食飽飽先開始行程。今次要介紹哩間位置偏僻，林立於窄街橫巷之中嘅隱世咖啡店。小街道有種日本嘅民居感覺，喺店舖門口已經可以打卡一番。「CoHee」一共有2間十步之隔嘅分店，但兩間加埋位置都唔多，建議避開中午嘅繁忙時間會較易等到位。佢哋有熱食、熱食、甜品，啱晒唔同胃口嘅你！不得不試係佢地自家炒同磨嘅咖啡，香醇而不苦澀，就算唔係咖啡愛好者都要一試！
第2站：山系風鈴祭
終於有一場屬於香港嘅山系風鈴祭喇！名為《願山》，由「山有文西」舉辦，主題「山嶺」嘅山系風鈴祭係善用錦田嘅社區空間，展現群山各具獨特嘅一面。展場展出超過100個祈願風鈴，以及30幅山嶺寫生畫。其中部分透明風鈴更繪畫出香港山嶺嘅獨特外型。
手繪香港山嶺風鈴 （獅子山）
手繪香港山嶺風鈴 （千島湖）
手繪香港山嶺風鈴（順序：大老山、大東出、大金鐘、妙高台）
山嶺寫生（順序：九龍坑山，大金鐘，南Y島索罟灣）
大家可以以織繩、鈴鐺及卡紙自製許願卡，將寄望同心願繫上風鈴，向群山誠心許願。有趣嘅地方係，風鈴會因應周遭環境，包括天氣、風力等等，變化出唔同聲效。好比大自然無窮嘅變幻。
《願山》山系風鈴祭
日期：2020年12月18日～2021年1月17日
時間：12:00～19:00
地點：錦田小區空間「迴響 」(即錦田公路4A)
第3站：錦田壁畫村
📍新界錦田吉慶圍週邊
壁畫村嘅原意係想透過壁畫為社區注入更多活力。發起人郭燕銘老師以「愛」為主題，加入圍村嘅歷史元素，等一班學生義工以壁畫表達對香港嘅感情，從而將藝術融入生活、文化同社區。
第4站：不一樣的跳蚤市集
📍新界錦田祠堂村
紅磚屋前身係洋蠋工廠，現在已經搖身一變，成為週末市集。裝修同格調都好有歐陸風味，加上聖誕吊飾，節日氣氛更加濃厚。
哩度大部份店舖都係展示或者售賣復古收藏品、雕塑擺設，二手陶瓷、二手衣物等。比起市區嘅週末市集感覺截然不同，有種於6、70年代尋寶嘅感覺。
良心小店：返璞歸真 天然手工皂
莎拉手工皂
(IG: @saramade.hk / FB: @saramade.hk)
📍新界錦田祠堂村紅磚屋36號
喺紅磚屋入面隱藏咗哩間良心而又天然嘅手工皂。「莎拉」嘅出品係無添加防腐劑、起泡劑、人工色素、香精等等，選用嘅優質材料都對人體、環境同生態零負擔。希望大家可以感受最自然嘅純真與單一美。手工皂款式特別、外觀精緻，買嚟做婚禮回禮、散水禮物，或者自用都好適合。
第5站：古老圍村
📍新界錦田錦上路9號
「吉慶圍」係一座已有500幾年嘅古老圍城，居民大部份都係鄧氏後人。早於1898年英國強迫清廷簽定《展拓香港界址專條》，而當時嘅居民不甘做英國屬民，所以以「吉慶圍」為據點，最後發生「鐵門事件」，而連環鐵門當年被英軍拆除並運回倫敦作戰利品展覽。期後到1925年先交還。
圍村內巷有種古老情懷，穿插於小巷之間可以感受當地文化，對長居市區嘅阿蛋嚟講覺得別有風味。
第6站：舊式跳蚤市場
📍西鐵錦上路站外（只在星期六、日和公眾假期開放）
剛剛行咗紅磚個新式市場，轉眼間就嚟到西鐵站附近哩個舊有風味嘅跳蚤市場。售賣嘅都係舊式食物，涼果、茶果、士多仔等，亦有非主流嘅服飾。雖然風格古舊，但香港嘅跳蚤市場真係買少見少，絕對值得前來感受嘅種舊港式風味。
良心小店：泰式風味 自家製惹味醬料
錦田黃車仔
📍新界錦田錦上路西鐵站C出口
去到附近記得留意下有冇一架黃色流動車仔！佢地嘅泰式料理都好好味，希望有朝一日有地舖，可以坐低品嚐。每日嘅菜式都唔同，但會事先喺facebook公佈，大家想支持嘅話記得留意官方資訊。阿蛋推薦佢哋自家製嘅「黃車醬壹號」，辣味適中，齒頰留香，配海南雞，甚至撈飯、撈麵都同樣出色。無添加防腐劑，100％香港製造。不過醬料只接受預訂，所以出發前記得搵定佢地喇！或者試過先，事後郵寄都可以～
雖然今次行程只有6個站，亦因錦田嘅良心食店有限，今次是蛋遊未能寫到晚餐以及甜品介紹。如果想繼續行程，建議出返元朗區，會有更多選擇。
如果有任何小店優惠、告急、或者想我地喺平台撰文介紹，
都可以IG私訊、網站填form、或者電郵致 852eggies@gmail.com
我地會盡所力，為大家帶嚟更多真香港人情報 (•̀ᴗ•́)و ̑̑
Комментарии