唔知大家知唔知石英錶同機械錶有咩分別呢？整造一隻機械錶係咪好複雜呢？今次阿蛋想介紹本土品牌「Watchmake Factory」，佢地設有自製機械手錶工作坊，等大家都可以體驗成為製錶師，新手都零失敗！LET’S GO ⇢
石英錶 VS 機械錶
石英錶最大特色用電力驅動，通常兩年都唔洗換電，相對方便同準確，一般誤差只有約1秒。價錢可高可低，視乎手錶有咩功能，例如溫度、計時、方向等，性能比機械錶多。常見大品牌有G-shock，SEIKO等。
而機械錶係以扭動機芯發條嚟做驅動，一般分為手動式和自動式。較主流嘅自動式相對方便，只要一直戴喺手上，機芯內擺陀會因手腕嘅動而旋轉運作。一旦長時間唔配戴機芯就會停止運行。機械錶嘅準確性不及石英錶，但著重嘅係機芯設計同工藝。機芯嘅類型、產地、製作嘅精緻度、錶殼用料、功能等都會影響價錢。常見自家製作機芯品牌有Rolex、Omega等。
香港製造 本土機械錶
根據香港政府統計處嘅報告，香港係全球主要嘅鐘錶出口地，以石英錶為主，佔2019年上半年總出口42%。咁香港有冇本土製嘅機械錶呢？今次阿蛋就想介紹「WatchMake Factory」，佢地於2016年創辦，設有自製機械手錶工作坊，等大眾都可以體驗成為一個製錶師。
自製手錶唔需要有相關經驗，新手都可以參加。因為工作坊會由製錶師親自教學，介紹機械錶原理同歷史及鐘錶業發展史，等參加者可以認識到機械錶特性後，選擇最適合自己嘅配件。「WatchMake Factory」使用高質素嘅日本機芯，錶面、錶殻、刻度、錶帶，每項超過一百款選擇，可以自由創作出獨一無二嘅機械錶。
Watchmake Factory使用日本製機芯。DIY製作過程
製錶師會先簡單介紹機械錶原理同歷史，再由超過一百款機芯，錶殼，錶面，錶帶，刻度中挑選一套最適合參加者嘅配件。參加者會喺製錶師指導下，於兩小時內完成創造一隻世上獨一無二、專屬自己嘅機械錶。
DIY Workshop由製錶師親自教學。
學員可以親手製作錶面。錶殼有2個尺寸，可因應手腕粗幼度、性別或者個人喜好去選擇。除咗自製一隻專屬機械錶，亦可以整嚟送畀朋友、家人或者愛侶，甚或相約一齊參加。完成後仲可喺店內影相打卡，將咁特別嘅時刻留念。
女裝：36mm錶殻／男裝：42mm錶殻。
如果有任何小店優惠、告急、或者想我地喺平台撰文介紹，
都可以IG私訊、網站填form、或者電郵致 852eggies@gmail.com
我地會盡所力，為大家帶嚟更多真香港人情報 (•̀ᴗ•́)و ̑̑
Comments