與其將食料唔新鮮、又凍冰冰嘅包放入口，倒不如去其他用料新鮮、口味新穎、而且CP值高嘅良心漢堡店。香港其實有好多值得一試嘅漢堡店，今次EP.1先介紹6間，港九新都有㗎 LET’S GO ⇢
❙ C+ Burger
📍西環西營盤水街10C號地下6號舖
港島西之選！漢堡除咗經典嘅牛肉配芝士之外，有加入黑松露醬、菠蘿做配料，亦有加入流心蛋，比較新派。店舖只有一款肉類選擇 —— 自家手打牛肉。肉質軟嫩且有肉汁，牛肉突出，加上任何配料都好惹味。另有芝士條、手指魚等小食追加，非常豐富。
⟠
❙ 利口福快餐店
📍太子大埔道14-16號華都大廈地下1號舖
區內少數嘅傳統港式嘅茶餐廳。最出名莫過於佢最邪惡嘅「流心芝士豬扒包」，即叫即製。口感豐富，豬扒脆嫩，整體咸香，一定令你食過翻尋味！另外「珍寶沙嗲牛肉包」同「沙嗲牛肉西多士」都好出名，夠地道，而且口味獨特。鋪面位置唔多，設有室外座位，依家入秋就算坐室外都唔驚喇～
⟠
❙ 時新漢堡飽
📍紅磡黃埔天地家居庭(第12期)地下G22-G23號舖
哩間應該街知巷聞，因為舊址好近理大宿舍，更傳稱係POLY學生嘅「飯堂」。一直被受吹捧，小編試過後亦都明白點解深受愛戴。漢堡包即叫即做，入口時仲係熱辣辣。肉扒表面微微焦面，香口脆身，但仍然保持肉汁。冇咩驚為天人，但就完美示範咩叫正常、良心、食之不厭嘅漢堡包。時新仲有其他港式小食，包括波浪薯條、炸洋蔥圈、炸雞髀等，充滿懷舊風情！
⟠
❙ 嘉寶漢堡
📍尖沙咀金巴利道78號金輝閣地下A號舖
📍葵涌青山公路葵涌段499號嘉寶大廈地下A-B舖
眾多漢堡店，哩間較多肉類選擇，包括牛．雞、豬、蝦、羊，仲有專為素食者而設嘅不可能素肉。可以追加嘅小食亦有10樣，飲品除咗汽水之外仲有比較養生嘅各種花荼。選擇繁多，價錢公道，食物水準亦令人讚不絕口，難怪長期都要排隊啦！
⟠
❙ 漢堡博士
📍屯門青柏徑6號鹿苑14號舖
屯門牛有福喇！漢堡博士嘅漢堡已經配搭好晒，只需要喺11款內周旋，冇咁個人代但好適合選擇困難症嘅朋友。肉類選擇都好多，牛．雞、豬、蝦、羊，魚、雞肝，應有盡有。有美國、英式、韓式、港式，仲有DR.創新款式，包羅萬有。另有「珠脆雞」同「肉桂蘋果西多士」，更有5款小食可追加，連食一星期都可以日日唔同款。另設兒童餐同學生優惠，一家大細都適合食！
⟠
❙ 鳩砌 (@gau1chai3)
📍土瓜灣馬頭圍道216號
話明「鳩砌」，梗係任你砌！土瓜灣開業不久嘅漢堡包專賣店，有四款基礎再任你疊加配料同醬汁，口味非常個人化。麵包並非用嘉頓，而係美式漢堡個種，相對鬆軟。肉款只有豬肉同煙肉，冇太多選擇，久唔久食一次都唔會悶。店舖開到零晨三點，附近街坊有福了，亦冇藉口話半夜冇夜食喇～ 老闆仲好貼心，驚大家等得耐，可以先whatsapp落單再後取，非常方便。
⟠
如果有任何小店優惠、告急、或者想我地喺平台撰文介紹，
都可以IG私訊、網站填form、或者電郵致 852eggies@gmail.com
我地會盡所力，為大家帶嚟更多真香港人情報 (•̀ᴗ•́)و ̑̑
Comments