近年興起食Bagel (譯：貝高/貝果)，煙韌有咀嚼感，款式多變，有咸有甜，而且飽肚。傳統貝高無糖無油，咁係咪健康之選呢？貝高其實又係咩國家嘅特式食物呢？今次同大家介紹貝高，解答謎思，最後推介6間良心貝高網店！LET’S GO ⇢
謎思1：貝高來自邊到？
「Bagel」一詞其實源自意第緒語嘅「Beigen」，意思係彎曲，係由東歐嘅猶太人發明並帶到北美洲，去到20世紀後期先成為北美常見食品。美國有好多出名嘅貝高連鎖店，發展非常蓬勃，所以一直被誤以為喺美國發明。
謎思2：貝高好易整？
傳統貝高嘅材料只有高筋麵粉、酵母、水同鹽，並冇加入雞蛋、牛油、糖、或者其他化學成份，係素食者都適合。但漸漸因為文化差異同埋創新款式，市面上嘅貝高，甚至網上搵嘅食譜都加入糖、牛奶、油份，而麵粉亦會加入其他筋性，從而改變咗貝高嘅彈性、延伸性同韌性等，因而創造更多新穎款式。
製作貝高步驟唔算繁多，但非常用時。首先要將材料搓勻、形成麵團，然後放喺溫暖潮濕嘅地方進行第一次發酵，需時2-3個鐘。發酵會令麵團變大，而過程中更可以釋放出最多糖、同時保留足夠嘅澱粉同蛋白質形成最佳嘅質地。下一步就係分割，之後放雪櫃進行第二次發酵。低溫發酵主要令酵母活性下降，等麵粉吸收多啲水份，增加貝高嘅煙韌感。其後係塑形，再進行多次低溫發酵，即第三次發酵。之後再經過煮滾，然後放入焗爐，最後先誕生！當然，喺唔同國家、地區，都有會改良咗嘅食譜，過程同製作方法不一，各有風味。香港亦有唔少貝高專買店（暫時網店較多），自創出獨特嘅味道，有啲更帶有港式風格同飲食文化。
謎思3：貝高比一般麵包健康？
若果以傳統無糖無油無餡料嘅配方，貝高的確比常見麵包低卡、低糖、低油，相對健康。普遍改良過後嘅貝高約250.2kcal，比起紙包蛋糕(238kcal)、牛角包(231kcal)更高熱量，甚至係一片白麵包(74kcal)嘅三倍有多！貝果亦一般伴隨忌廉芝士、果醬等食用，熱量、脂肪同糖份亦隨之增加，加上近年愈嚟愈多「爆餡」款式，當中嘅餡料更為高卡、高脂、高糖。所以貝高只係本體低糖、低油，但仍然要注意每日所攝取嘅卡路里，同埋不容忽視餡料嘅選擇。
良心貝高店
1 ❙ COMFORTBITE
充滿異國風情嘅貝高，有羅馬代表嘅「瑪格麗特披薩貝果」、台灣嘅「3Q Bagel」、泰國嘅「泰奶茶貝果」等。疫情令大家身體上去唔到旅行，咁不如味覺上周遊一次世界啦！
2 ❙ Bakery Donut B 冬甩 · 烘焙
主打無油少糖湯種貝高，比起一般貝高有水份，口感更鬆軟。款式類型偏向台式且咸味，可以代替正餐。除咗貝高，熱賣產品仲有甜食嘅盒子蛋糕，內加麻糬， 同樣啱晒鐘意有咀嚼感食物嘅朋友。
3 ❙ Plum子與貝果麵包
☑ 持食物製造廠牌照
「Plum子」嘅出品唔係爆餡款式，但餡料會因為應食材當做或者潮流而有所改變。例如上年聖誕節推出嘅蘋果肉桂乳酪貝果，非常有冬日氣氛。而且相對著重貝高自身嘅口感，鐘情於咀嚼感嘅朋友唔好錯過。
4 ❙ Monchi
「Monchi」嘅出品比較輕怡健康，低卡、低脂。最有特式，最代表香港嘅係黑黃扭紋嘅「檸檬竹炭bagel」，用上無添加嘅希獵乳酪，既健康又好味。
5 ❙ 貝果 | 司康
主要有6款，有咸有甜，其中比較特別係「核桃無花果」，以無花果嘅香甜吊味，特別又唔會太膩。用料無蛋無奶無油，適合素食者。
6 ❙ 鼻哥窿貝果
以水果夾心嘅貝高出名，其中「長野香印檸檬乳酪夾心貝果」以檸檬乳酪同雲拿尼醬夾住爽甜多汁嘅香印提子，整體清新，果香四溢，而且非常開胃。
⟠
如果有任何小店優惠、告急、或者想我地喺平台撰文介紹，
都可以IG私訊、網站填form、或者電郵致 852eggies@gmail.com
我地會盡所力，為大家帶嚟更多真香港人情報 (•̀ᴗ•́)و ̑̑
Comments