近幾年，香港有好多手工啤酒掘起。本土手工啤你就聽得多，有幾多間係良心小店、幾多間係自家釀酒廠？而除咗手工啤，香港仲有冇MADE IN HONG KONG嘅其他酒呢？等小編今日不專業推介6間良心本地釀酒廠啦 LET’S GO ⇢
▎Young Master 少爺啤
(@youngmasterales)
少爺啤酒廠早喺2013年就成立，過去幾年間更榮獲多項國際大獎。啤酒款式同製造過程都好別樹一格，例如會以木桶陳釀啤酒、酸啤酒、煙燻啤酒、甚至係野生發酵啤酒。口味獨特，啱晒鍾意試新嘢嘅朋友仔。
⟠
▎Mak's Beer 麥子
(＠MaksBeerr)
2014年就成立嘅麥氏釀酒廠，自稱自己「陀地」得嚟又「古靈精怪」。的確，佢地喺用料上會加入甘蔗、桂圓、香矛等港式材料去釀酒，口味出其不意。麥子主要生產啤酒，鐘意「啤啤佢」嘅朋友唔好錯過喇！
⟠
▎Lion Rock Brewery 獅子山牌
(＠HongKongWhistle)
聽個名都估到，品牌嘅理念係同70年代嘅獅子山精神有關。而創辦人都係秉承住嗰份刻苦耐勞，由2015年開始一直將呢份精神釀造入啤酒。口味較多果味同花味，口感豐富多層次，而且有淡濃嘅多項選擇。
⟠
▎gweilo beer 鬼佬啤酒
(＠gweilobeer)
近至樓下百佳都買到嘅鬼佬啤酒有咩特別？唔通真係贏在香港人祟洋主義？鬼佬啤酒喺2015年由3個英國人成立，但一直都冇自家酒廠，而係租借當時香港最大嘅精釀酒廠去生產，直到2017年先真正擁有自家酒廠。除咗名稱之外，價錢都非常親民，所以唔少啤酒愛好者都會放定一箱喺屋企「看門口」。現時，除咗啤酒之外，網方亦有GIN發售。
⟠
▎Hong Kong Whistle 吹啤啤
(＠HongKongWhistle)
2016年面世嘅吹啤啤，作品主要以香港具象徵性嘅人物，用味道同包裝設計帶出。當中好多都係香港文化同集體回憶嘅代表，可以話係賣啤酒之餘，仲賣緊故事。例如「碼頭咕哩」，以粗曠嘅烘烤咖啡同餅乾味道，帶出以前咕哩嗰種刻苦耐勞的精神，概念非常有趣。除咗手工啤之外，佢地亦有非酒精產品 —— 天然發酵，具有益生菌嘅康普茶。啱晒鍾意養生又追求健康嘅女仕們！
⟠
▎Perfume Trees Gin 白蘭樹下
(＠perfumetreesgin)
最後要推介嘅品牌非並以手工啤酒為主，而係GIN。而更令人驕傲嘅，係香港首個原創氈酒品牌，而且喺國際比賽中屢獲殊榮 —— 佢係「白蘭樹下」。創辦人希望將香港文化以GIN帶出，所以細意了解咗香港嘅地理同風象，再拼合出專屬香港嘅獨有風味。除咗啤酒之外，大家都可以支持一下本地GIN！
⟠
戴返頭盔先，小編非品酒家/酒精愛好者，只係非專業推介良心品牌。如果想了解更多產品資料，請向網方客服查詢。帶嚟不便唔好意思！
如果有任何小店優惠、告急、或者想我地喺平台撰文介紹，
都可以IG私訊、網站填form、或者電郵致 852eggies@gmail.com
我地會盡所力，為大家帶嚟更多真香港人情報 (•̀ᴗ•́)و ̑̑
Comments