成日聽見香港人祟洋、祟日、祟韓，但阿蛋相信每個真香港人心裏最愛嘅文化一定係「港式」，最引以為傲嘅，一定係「MADE IN HONG KONG」。今次介紹6間有本土特色、以本土生活作藍本、或以本土文化作靈感嘅手作店。睇下佢地點用一對巧手去演譯「香港文化」啦！LET’S GO ⇢
❙ Grew From Hands
冇眼花、冇睇錯，呢個係唔食得而又像真度超高嘅格仔餅／雞蛋仔皮革散紙包。除此之外，仲有「一底格仔餅」斜孭袋、「生命麵包」筆袋等，還原度極高！
⟠
❙ HANDMADESHIP
以香港人擁有集體回憶嘅物品作藍本，再用手作以另一個方法呈現，非常有情懷。例如上圖嘅護照套，用上家傳戶曉嘅雪糕車花紋同用色，中間個位就好似落單同拎雪糕個窗口咁，真係香港人先睇得明！
⟠
❙ WHY NOT HONG KONG
六、七十年代嘅香港人嗰種堅毅叫「獅子山精神」，大概哩間堅持香港設計嘅，就係新一代嘅香港精神。插畫以香港情景為題，例如有飛機低飛經過嘅九龍城、叮叮穿插於鬧市嘅港島、上演「幻彩詠香江」嘅維港等。由已絕跡嘅畫面，到近代嘅香港面貌，都一一印喺生活用品之上。
⟠
❙ BEIS LEATHER
港式奶茶杯、紅VAN小巴、富豪雪糕車，哩啲都係香港人經常接觸，但又好少停低欣賞嘅嘢。皮革師BEIS將港式生活獨有嘅花紋圖案都重塑於皮革品之上。欣賞皮藝同時，亦可以欣賞常見而又被忽略嘅本土特式。
⟠
❙ 維地士多
用手繪水彩，繪畫出具香港情懷嘅物品，製作成每日都可以使用嘅飾物，例如「白兔糖耳環」、「熊仔餅髮圈」、「茶餐廳頸鏈」等。由繪圖至組合全手工製作，非常有心思。
⟠
❙ Present For You Handmade
「三鰻魚蛋飯」、「蘋果日報」… 以香港人近年嘅生活為概念做嘅手作品，主要紀念用途。除咗本土情懷、港式圖案，更要承傳同延續嘅係「意志」。完美示範除咗本土文化同懷舊風情，香港抗爭點滴都係需要同值得宣揚。
⟠
如果有任何小店優惠、告急、或者想我地喺平台撰文介紹，
都可以IG私訊、網站填form、或者電郵致 852eggies@gmail.com
我地會盡所力，為大家帶嚟更多真香港人情報 (•̀ᴗ•́)و ̑̑
留言