光復上水・營造小社區／用「香港製造」踢走水貨舖

Dec 27, 20202 min read

對於「上水」哩個地方大家會有咩聯想？以前或者大家會異口同聲講「水貨客」！如今嘅上水已經今非昔比，再見唔到人山人海嘅大媽同篋神，反而見到更多嘅係香港人嘅面貌，一個小社區嘅安寧同舒服。「光復」過後，要再次凝聚北區人絕對唔係輕而易舉之事，但「上水貨舖」開業以嚟一直都秉承哩個信念去構思專屬北區人嘅活動、去幫忙基層家庭，希望將北區人重新連結。

「香港人用香港製造」

「上水貨舖」喺十月底先正式開業，主張「香港人用香港製造」。店內擺放林林總總香港製造嘅生活百貨——個人護理、日常用品、精品擺設、零食啤酒都一應俱全。超過九成都係本土品牌、本地製造。創辦人Dream喺訪問中提及：「香港人用香港貨，係正常不過。」的確，香港大部份商品嘅第一生產線早已消聲匿跡，早已依賴外地入口，但其實哩片福地蘊藏住嘅可能性比起我地想像更多、更大。

其中一個本土品牌「香港木庫」係香港嘅木材處理工場，主要係回收本地實木木材、處理政府及私人機構園林廢樹，以至打風嘅塌木、設計並重塑成為實用嘅家具、小品，冀望重建香港現代化木業。

香港木庫之商品，上水貨舖有售

另一間同屬回收重造嘅本土品牌「Mil Mill」係香港首間紙包飲品盒回收漿廠，每日處理約十噸紙包飲品盒，製成再生紙品，有廁紙卷、三摺式抹手紙、抽取式餐巾紙等。Dream表示，「永續消費亦係我哋保衛香港其中可以做嘅事，每人行多一步已經幫到好多。」再生紙巾可以確保回收廢紙嘅出路，令回收產業更穩固、更可持續發展。

紙包回收

連結上水營造社區

除咗對貨源嘅執著，Dream亦非常堅持去連結社區：「我覺得上水人係需要一個上水社區。」開業不足三個月，上水貨舖就舉辦咗好幾個活動，當中包括街頭音樂(busking)、試酒大會、北區中學同學會、唱聖詩+贈送基層小朋友蛋捲活動、「酒入你心」(北區單身男女配對)等，涵蓋唔同年齡層，希望重新連結北區人、凝聚北區力量、重拾北區人嘅歸屬感。「我諗哩個係行人專行區嘅意義，就係進行社區活動。」Dream相信，行人專用區係一個社區共享空間，去分享、共樂、相處，而唔係「篋來篋往」、令人討厭嘅地方。