終於見到2020年嘅車尾燈喇！一個發生大大小小令人傷心、詫異、失落嘅年頭，相信大家都想快啲完結，冀望新一年新事物新景象。喺完結之前，不如享受埋下年間最後一個節日—「聖誕節」。今日先講「聖誕蛋糕」嘅由來同推介6間良心蛋糕店啦！LET’S GO ⇢
點解聖誕節要食蛋糕？
聖誕節除咗有宗教意義之外，對西方文化嚟仲有家庭團聚嘅意思。一般西方家庭都會準備「聖誕大餐」，享受傳統美食共聚天倫。而糕餅都係必備食品，亦有經典嘅「聖誕蛋糕」。
經典英國「聖誕布丁」
云云西方國家中，英國人相對堅守慶祝聖誕節同重視聚餐。不過佢地嘅「聖誕蛋糕」其實亦稱「聖誕布丁」(Christmas Pudding）。起源於早期撒克遜人以蛋、麵粉與牛奶為材料，期後到中世紀更將水果、乾果等加入混合而得名為「布丁」。傳統文化中，小朋友都會參與製作「聖誕布丁」嘅過程，並喺攪拌混合物過程許願，係象徵家庭凝聚、和諧同希望。
香港良心「聖誕蛋糕」推介
香港人嘅聖誕節同樣著重普天同慶嘅概念，亦會相約朋友或者親戚聚餐，分享美食。今次為大家準備6間良心蛋糕店推介，等大家留低深刻回憶啦！
1．節日氣氛嘅蛋糕、曲奇、馬卡龍
❙ Foodie Buddies
主打卡通或者有公仔主題嘅蛋糕，有唔同姿態、表情，大路得嚟唔係倒模式製作，可因應個人喜好調節。佢哋嘅戚風蛋糕有彈性、唔會乾、亦唔太甜，絕對老少咸宜。
除咗訂購仲可以參加工作坊親手整，無論蛋糕、曲奇、定馬卡龍都咁有節日氣氛㗎！
2．花藝與蛋糕 優美又好味
❙ Bunphant Cake Studio
全部結合花藝嘅手作蛋糕都係自家設計，有個性得嚟又可因應主題而變化。新推出嘅「紅茶蘋果聖誕限定蛋糕」不但有冬日意境，亦有節日氣氛。一家人或者一班朋友食用都格外溫馨！
3．「嘩嘩嘩！」嘆為觀止嘅流心蛋糕
❙ Miss Marble 雲石小姐
主打雲石造型蛋糕嘅「雲石小姐」除咗外表可以因應特別主題而加減裝飾，內裏仲係流心㗎！一切開就蜂湧而出，相信唔至小朋友「嘩嘩聲」，大人都睇到嘆為觀至，一家人樂也融融，非常有歡樂嘅節日氣氛。
4．神還原集體回憶
❙ Amai Workshop
雖然唔多聖誕專設嘅主題蛋糕，但「Amai」嘅作品都係還原度極高嘅集體回憶。例如琅琅上口上嘅廣告歌「萬里望花生」、學習動動英文生詞嘅「愉快動物熊仔餅」等。集體回憶有種親近自己，與他人共享昔日時光嘅感覺，相信哩個聖誕節有「Amai」嘅蛋糕就溫馨又暖心。
5．充滿冬日聖誕氣氛
❙ noms 嚼嚼
深受歡迎嘅「noms」用色柔和，配以花藝同像真度高嘅手捏造型公仔，啱晒有主題嘅節日派對！蛋糕款式由兩位女生一手包辦，有獨特嘅創作風格。
6．健康微糖 淡色系少女蛋糕
❙ D.setime
以「花」及「茶」為主，採用健康食油同微糖配方製作嘅戚風蛋糕簡約多變，顏色多為夢幻少女嘅淡粉色系。打卡又得，用料又健康，啱晒減肥嘅女仔節日放一放蹤！
⟠
如果有任何小店優惠、告急、或者想我地喺平台撰文介紹，
都可以IG私訊、網站填form、或者電郵致 852eggies@gmail.com
我地會盡所力，為大家帶嚟更多真香港人情報 (•̀ᴗ•́)و ̑̑
Comments