最近確診人數又有上升趨勢，如非必要最好都係留喺屋企。一日三餐除咗叫外賣，不妨試下自煮。既可以消磨時間，又可訓練手藝，仲可以控制材料同份量，可以食得更健康。今次介紹6個良心煮食頻道，大家記得多多CLS佢地啊！LET’S GO ⇢
資訊型教學
❙ 點 Cook Guide
YT頻道：點 Cook Guide
Martin嘅片段相對詳細，會解釋做法效果，比較食材類別，得到嘅相關資訊更為豐富。片速較慢，可以同步跟住步驟，無論廚藝初哥定係熱愛煮食嘅都好啱睇。
清談型教學
❙ 煮家男人Bob's Your Uncle
Bob叔嘅煮食教學片段經常分享自己嘅價值觀，字字到肉、句句有力，有時侯真係睇到阿蛋覺得好爽！頻道上嘅教學片大需時，部分香料、食材、或者用具未必人人屋企都有。如果係新手入廚或者偶爾下廚嘅家庭未必有。若果你係熱愛煮食、或者對生活有要求，相信你都會睇到好爽！
ASMR型教學
❙ 懶人廚房 Lazy Cook’s Recipes
零旁白嘅懶人廚房以文字去交代烹調過程，係ASMR類型嘅煮食教學。觀看過程好減壓，亦會有種動力想跟住佢煮食。教學內容大多為中菜，出街就食多，不妨跟住做，自己煮更健康安心啦！不過會愈聽愈餓，切勿深夜觀看～
BB班教學
❙ 成波之路 my ways to get fat
波師奶不時分享食譜，用料或調味或會繁多，但步驟一般較少，加上表達清晰，所以就算新手都可以跟住整。片段唔會冗長，加上鬼馬嘅旁白，令人睇完好放鬆。
多國菜教學
❙ 唔熟唔食 Cook King Room
YT頻道：唔熟唔食 Cook King Room
頻道圍繞中、西、法、日等多國菜式烹調教學，Arthur邊做邊講，以傾偈方形式分享，過程好似睇朋友煮食咁，佢自說自話嘅反應亦非常盞鬼。由廚具、食材到烹調過程都可以感受到Arthur對煮食嘅要求同享受，不禁令人跟佢煮食！
精美甜品／輕食教學
❙ Amy
YT頻道：Happy Amy
Amy嘅頻道較多甜食同輕食分享，食物種類比較適合女仔睇。介紹詳盡、內容清晰，而且賣相吸引，男仔學嚟整畀伴侶都好容易上手同成功！
⟠
如果有任何小店優惠、告急、或者想我地喺平台撰文介紹，
都可以IG私訊、網站填form、或者電郵致 852eggies@gmail.com
我地會盡所力，為大家帶嚟更多真香港人情報 (•̀ᴗ•́)و ̑̑
コメント