相信唔少返工一族都會帶飯，一嚟唔洗出去逼，二嚟又可以慳錢。今次介紹6款本土調味醬油料，可以炒菜炒飯、撈麵、配燒賣等小食，甚至配湯渣都可以！加上就嚟入冬，一於買返罐隨時打邊爐啦！LET’S GO ⇢
無辣不歡：辣油、辣醬、辣椒渣！
❙ 辣殺
如果係無辣不歡嘅你就啱晒喇！有份辣油、辣醬、辣椒渣3個版本，點煮點配任你話事！辣油可以將食物昇華得嚟唔影響口感；辣醬最適合涼伴小菜，最「襟撈」；辣椒渣除咗味覺仲有口感享受，可以咬到粒粒精華，更濃郁刺鼻！另外仲有「OH SHIT」加辣版辣油，打邊爐㷫烚烚、加埋辣油火辣辣，成個冬天仲唔暖暖笠笠？！
滄海遺珠 大澳出品
❙ 大澳泰記
(網上代購： @livingwithawarenesshk)
街外人未必認識大澳嘅品牌，只係知道大澳出產十居其九都係蝦醬。咁就錯了！專頁「本土 | 良食」就為大家介紹大澳良物：大澳泰記馳名嘅「銀蝦XO醬」、「梁山辣膏」及「瑤柱野山椒辣汁」等。仲推薦XO醬配蝦子麵哩種最港式撈麵。
用料上盛 送禮自用一流
❙ 米太良品 Tastes by Mrs Mic
佢地嘅招牌自家XO醬有2款：用上純正大西洋鱈魚製成嘅「米太鱈花XO醬」及配搭原粒北海道元貝製成嘅「米太櫻花蝦XO醬」，用料上盛，獨特而有鮮味，非常惹味。兩款都微辣，啱晒唔太食得辣但又想過下口癮嘅朋友！
鮮味煮意 鹹鮮味濃
❙ 順新香
主打「海皇XO醬」加入櫻蝦、魚乾同金鈎蝦米，令人整個口腔都充斥住海水嘅鹹鮮味，一試難忘。簡簡單單配個魚肉燒賣都有鮮味，更燒賣味道昇華，可以話係百搭又大眾化嘅XO醬。
100%香港出品蒜香醬
❙ 蒜頭婆 Garlic Po
蒜頭婆嘅「蒜香醬」背後蘊藏一個極具意義嘅社企計劃，希望老人家「老有所為」，感覺自己有生產力，而且可以連結區社。所以，蒜頭都係由「蒜頭婆」同一對孫仔女剝，另外用上米糠油、本地豆豉、本地有機辣椒、本地有機生曬菜脯、同西貢鹽田梓海鹽。成份都係本土、天然、新鮮，百份百香港出品。
堅持香港製造老字號
❙ 悅和醬園 Yuet Wo
悅和嘅商品相對最廣泛，由醃製用嘅酒、醋、蠔油、豉油，至烹調用嘅柱侯醬、蝦醬、海鮮醬等「方便醬」，到點醬用嘅甜醬、豆瓣醬等，一應俱全。始於1945年，全部醬料都係自家天然生曬，而且咁多年都堅持香港製造，不愧為香港人值得擁有嘅品牌之一。
⟠
如果有任何小店優惠、告急、或者想我地喺平台撰文介紹，
都可以IG私訊、網站填form、或者電郵致 852eggies@gmail.com
我地會盡所力，為大家帶嚟更多真香港人情報 (•̀ᴗ•́)و ̑̑
Comments