有冇讀者對「獨一無二」有種癖好？唔想同人撞款，寧願訂製、有自己個性，都唔想買倒模式設計？今次介紹嘅良心店舖以人手加工，將平平無奇嘅商品化為神奇。無論送禮定自用都好突顯個人風格。LET’S GO ⇢
人手紮染
紮染工藝絕對係打破倒模式設計之一。每件作品都係透過捆綁布料同染上鮮艷顏色，造出唔同花紋圖案。經人手紮染，每件略有不同，全部獨一無二。
❙ Slient Tiedye
衣櫃若果只有淨色嘅衣物就太乏味喇！假日又或者感到苦悶嘅話，不妨著返件醒神啲嘅衫。第一間介紹嘅「Slient Tiedye」主打紮染服飾，由帽到襪、由頭到腳，總有一款可以幫你轉換心情！紮染顏色青春活力，有街頭風味。經加工過後，比起倒模式嘅潮牌衣物更有型格個性。衣物尺寸男女通用，可以襯返套「情侶衫」！佢地來年仲會推出工作坊體驗，密勿期待同留意官方資訊喇！
❙ Daily Leisure
結合布藝同紮染技術嘅「Daily Leisure」可以客製儲物袋尺寸，大至放WAKESURF板，細至放SWITCH。配以運動用料，有彈性方便載物，唔會變皺，亦易於清潔。鐘意運動嘅朋友可以訂製瑜珈服衣物袋、鞋袋等。絕對係又靚又實用！
流沙設計
靜靜地呆望住流沙流動，帶嚟嘅視覺衝擊有用難以言語嘅療癒感。有時候我地就係需要一個喘息位，去放空、去欣賞身邊事物，去發掘更多可能性。流沙款式多數用上金黃色或玫瑰金嘅沙粒，感覺奢華高貴，送禮或自用都唔錯。
❙ Pearly Bluen
「Pearlybluen」專售Airpod保護套，全部都係人手製作嘅流沙款式。有多款卡通人物、表情、配件選擇，將趣怪同可愛集於一身。
❙ a.caseland
另一間要介紹嘅「a.caselad」款式相對較多，有矽膠款亦有流沙款。可以自由配搭配飾同印名，絕對係專屬你嘅Airpod保護套。
噴漆手藝
看似簡單，但其實製作需時，而且作品要富有藝術感，絕對唔容易。噴漆作品多與星空掛勾，令小編不禁想哼返句「銀河上邊跌宕邊看緊對方，跨宇宙又橫越洪荒 ♪」。
❙ Fingers Work
「Fingerswork」嘅手噴系列，唔單止創造出自己嘅小宇宙，仲可以保護電話、電腦、ipad等，無懼跌碰，跨越時間，「遠近佢都護航」 。除咗客製，仲可以參加工作坊，體驗噴製，片刻忘憂，沉醉喺自己嘅宇宙。
❙ Soy Yo Studio
「Soy Yo」不時分享噴漆過程，等大家認識多啲哩門手藝。小編最鐘意「HONG KONG before 2019」哩幅作品——呈現咗香港高樓林立嘅特式，配以彩色噴漆以及夢幻嘅星球設計，令人憧憬而且想響往置身於哩個美好城市。唔知2020年嘅大家，對畫作又有咩感受呢？
⟠
如果有任何小店優惠、告急、或者想我地喺平台撰文介紹，
都可以IG私訊、網站填form、或者電郵致 852eggies@gmail.com
我地會盡所力，為大家帶嚟更多真香港人情報 (•̀ᴗ•́)و ̑̑
Comments