嚟到第3篇，阿蛋繼續推介香港人風味嘅品牌及產品。當中嘅創作有承載沉重過、有秉承上代精神、亦有傳承本土文化。希望大家多多支持各位香港創作者，一齊堅守Made in HK啦！LET’S GO ⇢
屬於香港人嘅獅子山創作
❙ 光年百貨
去到東京，會見到好多富士山印刷品；去到巴黎，會見到好多巴黎鐵塔鎖匙扣；點解香港，就偏偏缺乏最具代表性嘅「獅子山」產品呢？「光年百貨」透過獅子山圖案創作嘅物件，例如徽章、襪等，去將最引以為傲嘅獅子山發揚光大。其實上世紀嗰種不屈不朽嘅拼博精神一直都冇磨滅，哩代嘅香港人唔只將哩份努力局限於工作，更去堅持突破同創新，造就更多可能性。
保育、 創造、傳承繁體字
❙ 思緒俠
文字——係記錄嘅最好載體。「思緒俠」創作各種繁體字設計，以電話殼等唔同日常媒體去帶出，從而每日反反覆覆反思、牢記。另外，亦有推廣香港文化嘅意思在於其中。繁體字喺我地應該守護要核心價值之一，而「思緒俠」嘅理念，就係保育、繼而創造新的造字風氣，令文化得而傳承。
港女們的日常布藝及皮藝品
❙ Pursful
(@pursful)
明明可以用機器取替，但店主堅持手工刺繡針，彰顯出佢對手工藝嘅熱誠。要對得住「香港製造」哩個名聲，絕對唔容易。主打護照套嘅PURSFUL可以訂製獨一無二嘅護照套，除咗布料、顏色、字型之外，仲可以自訂主子嘅樣模，或者個人肖像。除此仲有零錢包、手提包等其他布藝，亦有美化抗疫用品嘅搓手液皮套、卡套等其他皮藝。產品時尚、得體，配以金色更高貴優雅，非常適合女孩子。
香港人，抖下啦
❙ 無謂野
店主話：「黑暗嘅時代，總要比自己抖抖。」的確，要休息先可以行更慢長嘅路，咁不如一齊飲返杯先？佢地主打嘅shot glass都係自己磨砂，包裝用嘅木盒都係親手設計、切割、黏貼、刻字，每件都係心血之作。由包裝到產品，都係非常精細嘅「藝術品」，收藏、自用定送禮都好適合。無人不曉嘅「香港/加油」玻璃杯圖案已經得到設計師授權。
*每單訂單不扣除成本地捐出10%予有需要嘅香港人 (定期更換受惠組織)
香港人嘅共同語言
❙ 時代閱曆
以簡化圖像或者符號去敍述香港發生嘅人與事，有傷痛的回憶、有憤怒嘅事件、有冀望嘅未來。一本座檯日曆蘊含住香港人百感交雜嘅思緒，誘人反思、叫人憶起、發人深省。透過哩本「時代閱暦」，建立一套屬於真・香港人嘅共同語言。
*所有收入扣除成本後, 全數捐贈612人道支援基金
自訂相機帶專門店
❙ Take Tag Told
主打帆布相機帶，可以自訂文字、數字、圖案，配以唔同字型同顏色，製成一條專屬、獨特嘅相機帶。除此，仲有帆布鎖匙扣、帆布拉鏈袋、鞋帶等自訂產品，加埋自家設計嘅包裝盒，送禮定自用都一流！
⟠
如果有任何小店優惠、告急、或者想我地喺平台撰文介紹，
都可以IG私訊、網站填form、或者電郵致 852eggies@gmail.com
我地會盡所力，為大家帶嚟更多真香港人情報 (•̀ᴗ•́)و ̑̑
Comments